الفلقة

فمة واحد ولدو موش حابب يمشي للكتاب، كركرو نهار بالسيف وقالّ لسيدي المدّب : هاي الاميّْنة عندك ، قرّيه وإذا ما يحبّش وإلاّ يتْكرْبن حاسبني بالجلد

هاك المدّب حطّ الطفل قدامو مع بقية الصغار وبدا يقول أليف لا شيء عليه، لولاد يقولو والوليّد الجديد مبكّش.

يا ولدي قول اشبيك ساكت؟ اتكلم قول الف لا شيء عليه.. الطفل يبحلقلو وما حبّش ينطق...

تي اتكلّم اشبيك؟ شي النافع ربي... صار انت كي الحلفاء ما اتطيب كان بالرزام.. عطاه على اكتافو بالعصا الطويلة، هزّلو ساقيه في الفلقة وعطاه لين تعبت يدّو.. ما لقاش معاه دوا، قالو المرة الجاية ما نقبلك كان ببوك...

لوليّد روّح لبوه قالو سيدي المدّب حاشتو بيك، قالو: اشبيه هذا ماو خالص معاه بالامارة عطيتو دجاجتين وخمسة حيار عظم حق شهرين، بالكش عامل بعض العملة ماني نعرفك شيطان وكلب بن كلب...

من غدويكة البو هز روحو ومشا للكتاب....اه من هاك الشيطان قالو الشيخ عمري ما ريت واحد زطّاط كي ولدك، نقلو قول اليف لا شيء عليه وهو ساكت يبحلقلي وما ينطق بحتى كلمة، قرقت بيه، عطيتو طابع حلوة، عطيتو على ساقيه بالفلقة شي النافع ربي.. البو تلفت الولدو وقالو اشبيك بكشت يا ولد الكلب، الشيخ يقلك قول الف لا شيء عليه تقول مالا علاش انا نعطي في الدجاج والعظم باش تطلعلي بهيم؟؟

قال لوليّد باهي كي نقلو اليف لا شيء عليه ماو تاو يقلي قول باء نكتة من لوطة، نقلو باء نكتة من لوطة ماو تاو يقلي قول تاء زويّز من فوق وهلمّ جرّا.. اش كلفني أنا بها الجوجمة ماني من اليف لا شيء عليه نصكّ ونحرن ونربح مخّي ... وحديثنا قياس موش حصيرة يقعدو عليها الناس...

ملا شيء

توة بالحق ما عادش انجمو نقولو للشيء راك شي إلا ما يحكم الحاكم ويخرج حكم قضائي يصرّحلي باش نقول للشيء يا شيء وإلا يا شي راك ما جيت شي... وكي الحاكم يقلي ممنوع ،انجّم نعمل قضية استئناف باش كي نقلّو يا شيء يا بن شي ما ينجم يعملي شي؟ باهي وكي يعملي هو قضية تعقيب ونقعد ما نقول شي وما نجم نعيطلو بحتّى شي باش نعيطلو أنا؟ والله شي يحيّر وما خلالي في مخّي شي.

الارهابي موش ارهابي حتى يحكم القاضي الي هو ارهابي، وبما انو القاضي عندو برشة ملفات وتحبلو سنين باش يوصل يحكم على الارهابي انو ارهابي، سي الارهابي ينجم يقدم بيك قضية في الثلب وتطلب منو السماح على الكلمة متاعك ما كانش ترصيلك في خطية وممكن شهرين في دار خالتك باش تتربى وما عادش تجبد العباد بالعيب، وترصيلك تطلب في السماح وتقرق وتتمسكن وتقلو سامحني سي الارهابي هاذي طريحة التوبة، انت حاشاك من الارهاب، انت تمارس في حقوقك التكفيرية و هوايتك في قنص المواطنين الابرياء والامن الوطني، انت موش ارهابي حاشاك تي انا هو الارهابي الي قلقتك ومسيتلك مشاعرك وما احترمتش خصوصياتك.

فوضى التسميات انتهات، وفى هاك العهد متاع ما تقول للسارق يا قطعي وللباندي يا زوفري وللديكتاتور يا ظالم، ينجمو يشكيو بيك ويبهذلو بحالك في المحاكم وترصيلك نهار الكل تعمل في قروض باش تخلص الخطايا الهابطة على راسك.

ولهذا انا ننصحكم من اليوم راجعو اموركم وهذبو من لغتكم على خاطر ممكن ياسر العدوى توصل للحيوانات وترصيلك كي تقول يا كلب على بوبي يشكيو بيك بتهمة تكليب الرأي العام على جنس مسالم من الحيوانات المنزلية البريئة وترصيلك عاد تقرق بفوكس واخوانو باش يتنازلولك وما يتحطمش مستقبلك.

تحت الطاولة

قالي اعطيني حاجة تحت الطاولة ونتفاهمو... قتلو علاش تحت الطاولة ياخي

 ساقها مكسرة والا تخاف على الحاجة تتبزع، قالي لا افهم، هات تحت حس مسّ ونقص من الحسّ، قتلو ما فهمتش علاش ياخي نسرقو احنا، لحكاية الكل تصححلي الوريقة خليني نقضي شوري، قالي تي اشبيك تكثر من الهدرة، ماني قتلك شورك صعيب وكان تحب أمورك تمشي مشّي حاجة تحت جنح الظلام ولا ريتني لا ريتك ولا تعرفني لا نعرفك وبالمييت وربي يسمعنا على بعضنا علم الخير، اش بش يقول الميت قدام غاسلو، مشيتلو حاجة تحت الطاولة، عندي قطوسة فارسية عينيها صفر رميتهالو تحت ساقيه قلت تاو تمشي وتجي تحت الطاولة فماشي فار تاو ترتحو منو ويصححلي وريقتي ويا ناس ما كان باس وكل واحد محنتو وين جات ما نعرفش علاش تغشش وشاط هاك القطوسة وقالي تتبهنس ياخي ما تعرفش الّي روحك في يدي ومن غير تصحاحتي ما تنجم تعمل حتى شي وأمورك الكل تاقف؟ ايه فاش جات القطوسة، والا اضرب القطوسة تتربى العروسة؟ صاحبي قالي ياخي وين عايش انت؟ ما تعرفشي الي ما يمشي حتى شي الا ما تمشي حاجة تحت الطاولة؟ ياخي مطلوب فيك هو يزربلك القضية متاعك، اش تحبلو باش يحل الدوسي، ويقرا لوراق ويثبت البيانات ويجبد ستيلو من القجر ويصححلك، شوف قداش من حريرة مشات زيزي جرة المطلب متاعك باش بش يعوضهم؟ ماو بالشيء الي يتلم تحت الطاولة وانت بكل بساطة ترميلو قطوسة تحت ساقيه تهربلو بالساشي الي لامم فيه الغلّة؟